Svo mælir hver sem hann maðurinn er til

Þriðjudagur, 13. mars 2012

Hefjum Ísland upp á næsta stig. Gefum lífsgildunum tækifæri.

Eins og við vitum hefur gengið mikið á hér á Íslandi á undanförnum dögum og mánuðum. Menn berjast með tungum og tölvum. Taumlaust orðagjálfur flæðir af munnum fram og höndum frá. Allir þykjast vita betur en hinir. Jafnvel prófessorar geysast fram á völlinn og skrifa harðorðar greinar sem og aðrir lærðir og leikir. Baráttan og orðaflaumurinn er endalaus og ávirðingarnar eftir því ganga á víxl. Eiginlega alveg með ólíkindum að sumir lærðir menn skuli vera svo vanhugsi að láta frá sér þau orð sem fólk hefur orðið vart við að komi frá þeim. Og skammarlegt að jafnvel sumir prófessorar skuli lenda í slíku orðaskaki sem oft sést fara frá þeim. Alþingismenn eru þar ekki undanskildir frá öllu saman. Þar sem árásir ganga fram og til baka á persónur í hæstu opinberu stöðum. Nokkuð sem þeim er alls ekki sæmandi sem kosnir fulltrúar þjóðarinnar.

Nær engar raunhæfar lausnir hafa orðið að veruleika. Og fáir trúa, því hugsandi fólk veltir því fyrir sér hvað rétt það sé sem stjórnvöld og ráðamenn bera á borð fyrir almenning. Oft koma sömu skrifin með svolitlum tilbrigðum aftur og aftur, þar sem sjaldan kemur eitthvað nýtt í ljós eða alvöru nothæfar lausnir borðnar á borð fyrir fólk frá stjórnvöldum. Þjóðin er hætt að hlusta. Spurningarnar eru einfaldlega orðnar of stórar sem lítil svör hafa fengist við. Sennilega hefur aldrei verið eins rifist mikið í fjölmiðlum og á bloggum hér og þar upp á síðkastið. En nú er komið nóg! Nú er orðið ljóst að við þurfum losna við allt bullið og láta hendur standa fram úr ermum. Því annars komumst við ekki áfram saman inn í framtíðina.

Í krafti okkar íslendinga ættum við að geta sameinast í þeim atriðum sem þjóðin þarf virkilega á að halda. Á þjóðfundi árið 2009 voru dregin fram þau mannlegu gildi sem þjóðin vill byggja á. Þar kom greinilega fram sú framtíðarsýn sem þjóðin vill leggja áherzlu á. Þar voru nefnd atriði eins og: heiðarleiki, virðing, kærleikur, jafnrétti og fjölskyldan, svo nefnd séu dæmi. Sem og með nýtingu náttúruauðlinda okkar sem við eigum fullt af. En þetta eru einmitt þau atriði sem búa til sérstöðu okkar sem þjóðar.

Til þess þarf að byggja upp það umhverfi sem væri best til þess fallið til að ná fram þeim atriðum sem þjóðin vill vinna saman að. Í krafti okkar íslendinga sjálfra eigum við að vinna útfrá og treysta því að Ísland geti náð virðingu þeirri í heimi þjóðanna sem okkar landi ber. Það er kominn tími á það.

Við þurfum að hætta að setja peninga og hagkerfi í fyrsta sæti. Það getur hreinlega ekki verið að það mannlega sé verra en hitt sem við höfum búið við hingað til.

Við þurfum að vinna saman að því að hefja Ísland upp á hærra tilverustig þar með þessi gildi að leiðarljósi og setja mannúð og fjölskylduna í fyrsta sæti.